Mearrasámiin leat leamaš viehka fásta ássánbáikkit máŋga čuođi jagi. Sávza lei ja lea ain deaŧaleamos eallu. Sávzzas leat ožžon ulluid, ja ránu sáhtte buvttadit siiddas. Botne snálduin gitta dán čuohtejagi álgui. Dalle botnigohte doarttain.
Gárre ulluid unna
giehtagáraiguin ja beaŋkagáraiguin 1957 rádjái. Dalle ásahuvvui Kåfjorddalen
Ullkarderi mii geahppudii barggu. Gođđit dolvot ulluid dohko, ja ullu gárrojuvvo
rullan maid gođđit ieža botnet sihke čuoččan ja gođan.
Seastin dihte leat dávjá atnán
gárgejuvvon láiggi čuoččan. Botne maid časkkáhagaid čuoččan. Čuočča ii oidno
válmmas ránus, dušše diehpit oidnojit ránu loahppageažis. Sihke čuočča ja gođa
lea oktageardánis láigi. Čuočča bodnojuvvo čavgat, gođa fas bodnojuvvo nuppe
guvlui loažža. Dušše várfeláigin adnojuvvo geardojuvvon
láigi.