Gáivuonas ja nuortalaččaid gaskkas gávdno boarráseamos suohppunvuohki maid dovdat. Suhppot ja bidjet ovtta ránu nala hávil. Ránus leat golbma rátnoholbbi, mat vuosehit ahte lea gođđojuvvon árbevieru mielde. Nubbi dovdomearka lea ahte suohppun guođđá diehpi várffi goappáge beallái.
Suhppot suohppunstuliiguin.
Leat golbma suohppunsoappi, guokte leat guhkit ja okta lea oanehaš. Ovdal cogge
suohppunsoppiid njuolga darfegoađi guolbái. Easkka dán čuohtejagi álggus álge
coggat daid suohppunmuoraide. Suhppot niikuniin. Gođđi sallu várfeláiggiid,
bealli leat čáhppes laiggit, bealli fas vilges láiggit. Daid son coggá niikunii
ja čatná daid guovtte suohppunsoappi birra. De son sallu čuožžamiid. Daid son
gođđá várfái nu ahte čuožžamat šaddet várffi gođan. Juohká go lokte ja vuolida
niikuna. Gođidettiin várffi son čatná čuožžamiid fihtiid mielde ja sirdá
várfeláiggiid suohppunsoppiid birra, dassážiigo várfi lea doarvái guhkki. Danne
go suohppu mohkiid, de šaddet guokte láiggi juohke juhkosii, juoga mii maiddái
lei dábálaš ovdahistorjjálaš gođđosa várffis. Čuoldá juogu
suohpudettiin.
De sirdá čuožžamiid
rátnostuliide. Gođđi goarru várffi bumma ráiggiide. Son cegge cakkiid seainni
vuostá ja lokte bumma cehkiide. Fiehtit leat dál heaŋgáme guovtte ráiddus.
Čuožžamat leat veaháš guhkibut go rátnostuolet, ja gođđi giessá láiggi geđggiid
birra, goappáge ráiddu sierra. De son gierrá, maŋit čuožžamiid sierra ja ovddit
čuožžamiid sierra. Gierrinsoabbi lea gaskkas.
Vuollin heáŋgájit
rátnogeađggit, sullii 11 bára stuora rátnui. Gođđi viežžá geđggiid fiervvás
dahje jogas. Vihkke daid gieđain. Juohke geađgi galgá deaddit goit gilobeali
stuora rátnui. Ravdageađgi goappáge bealde lea losibuš go geađggit
muđuid.