Gođđin

Ovdal go gođđigoahtá, de gođđi ferte ávildit. Son čatná áviliid guhkes árppuin, ja dušše maŋit čuožžamat ávilduvvojit. Hávil váldá ovddos guokte čuožžama, ovddit čuožžamiid gaska.

Gođidettiin lea gođa uttus: Gođđi giessá láiggi moddii gieđa birra, de váldá láiggi eret ja ráhkada su. 50 cm mohkiid. Juohke mohki maŋŋil giessá láiggi uttu badjegeaži birra, nu ahte šaddá oaivin, su. 10 cm guhku. Gođidettiin boahtá láigi uttu siskkabealde. Vivššas bohtet 2 uttu.

Gođđi vázzá ovddos maŋos rátnostuliid ovddabealde ja čuoldá váccidettiin. Son hoigá gođđaga bajás suorpmaiguin, ja čavge go geassá čuožžamiid juhkosiid guovtte guvlui. Gođidettiin fieraha válmmas gođđosa bummii. Dađistaga ferte guhkidit čuožžamiid: ložžet fihtiid geđggiin ja hoigat girriid geđggiid vuostá.

Son gođđá dáinniid ja bálluid. Dáinnis leat hearvastábit ja njulges stábit. Gođđit leat álo ráhkadan ođđa hearvvaid dan mielde maid sii leat oahppan ja oaidnán, ja maiddái oasti sávaldagaid mielde. Dattetge gávdno ortnet. Jus okta dahje eanet dáinnit leat vearrut gođđojuvvon, de dadjet ahte rátnu lea skielgá.

Go rátnu lea válmmas, de gođđi ložže girriid cakkiin ja giessá gierrinárppu nođđun nu ahte fas maŋŋil sáhttá atnit daid. Čuožžamiid gaskat čuohppá su. 10 cm. rátnoravddas ja diktá geđggiid gahččat bodnái. Čuolbmada dihpiid, gálgá ja giessá áviliid nođđun ja čoavdá ránu.