Boares ránuin sáhttá várfi lea
áibbas čáhppat dahje dušše ovtta ivnnis. Stáinnarbánitge sáhttet leahtit dahje
njulges čáhppes/vilges stábit dahje ivdnestábit. Dávjá boahtá várffi hearva
nuppádis ránu loahpas ja gohčoduvvo loahppageahčin. Dán áiggi leat
čáhppes/vilges stáinnarbánit dábáleamos hearvvat.
Ovdal soađi gođđe dábálaččat
listtu bajimussii ja dávjá maiddái vuolimussii. Listtus lea iežá ivdni go
dáinniin. Listtus ii lean fásta govdodat iige fásta ivdni, vaikko rukses ja
čáhppes ivnnit ledje dábálepmosat. Listtu vuolábeallái bođii bállu, ja de easkka
vuosttaš dáidni. Ránus ii leat šat listu dán áiggi.
Boares ránuin lea stuora
variašuvdna hearvvaid dáfus. Ránu dáinnis ledje dolin njulges stábit, ja
ovttageardánis dahje guovttegeardánis stáinnarbánit. De šattai dábálaš gođđit
eanet stáinnarbániid, dávjá seammálágániid go várffis. Maŋŋil bohte kihtegat,
mat leat bohciidan stáinnarbániin.
Sáhpánbánit leat dego
stáinnarbánit, muhto unnibut. Áiggi mielde gođđe unnit njulges stábiid, máŋgii
dušše ovtta juohke dáidnái. Sáhtte miela mielde gođđit dáinni hearvvaid, muhto
stáinnarbánit galget leahtit mielde. Ránus leat dál dábálaččat dušše guokte
sierralágan dáinni mat geardduhuvvojit.
