Nuortalaččaid rátnogođđin

Go boazobargit vulge guođuhit bohccuid, de válde ránuid mielde lávvui ja goahtái, rehkii ja noađđehearggi sealgái. Rátnu lei maid deaŧalaš gávpegálvu, ja sámit mákse vearu ránuiguin dahje lonuhedje daid iežá gálvvuide.

Nuortalaččaid bargovuogit leat hui seammálaganat go mearrasámiid, sihke go suhppot, go bidjet ránu nala ja go gođđet. Maiddái nuortalaččaid ránuin lea várfi. Sii eai ane makkárge suohppunstuliid go ráhkadit várffi. Guokte olbmo dahje eanet barget veahkálaga go ráhkadit čuožžamiid. Okta olmmoš doallá várffi, nuppit gođđet ja suhppot čuožžamiid oktanaga. Rátnostuolet leat hui allagat, ja állejit seainni vuostá. Gođđi čuožžu rátnostuliid maŋábealde.

Várfi lea oalle govddat, 8-10 cm. Várffi hearvvat leat ruvttot dahje máŋggageardásaš stáinnarbánit. Gođđet ránu vilges ja čáhppes láiggiiguin, dahje gođđet vilges bállu ja máŋggaivnnat dáinni. Lávejit bárgidit várffi dihpiid.

Dáinnis leat njulges stábit, dávjá ivnniiguin. Sáhttet leat 4-5 njulges stábi juohke dáinnis. Ránus galgá leahtit listu, dahje iežálágan dáidni bajimusas ja vuolimusas ránus. Nuortalaččat leat atnán ja atnet velge šaddobáidnon láiggi rátnui. Dábáleamos šattut leat guobbarat, soahkebárku ja geađgegatna. Sii atnet geađgegana ivnni hui árvvus go dan lea sidjiide váttis gávdnat guovllusteaset.

Rátnoárbevierru nuortalaččaid guovllus lea nuppástuvvan seammáládje go min guovllus, atnubiergasis čikŋagálvun. Rátnogođđin ii šat oahpahuvvo buolvvas bulvii, muhto gurssaid ja iežá oahpaheami bokte. Vaikko nuorat ohppet gođđit, de ii gallis joatkke. Dainnago leat olu boraspiret nuortalaččaid guovllus, de leat eatnasat dál heaitán sávzzadoalus. Ostet eanaš ulluid iežá guovlluin.